23 noyabrda Shavkat Mirziyoyev Toshkent shahridagi "Yangihayot" industrial texnoparkiga tashrif buyurdi.

Texnoparkda umumiy investitsiya hajmi $101 mln boʻlgan 8 ta korxona ishga tushirildi va 520 ta ish oʻrni yaratildi. Davlat rahbari ayrim korxonalar ishini koʻzdan kechirdi.

Almerro Group korxonasida Krember brendi ostida qandolatchilik mahsulotlari ishlab chiqarilmoqda. Buning uchun 3 gektar yer ajratilgan, loyihaga $22 mln investitsiya kiritilgan, Italiya, Ispaniya va Turkiyadan uskunalar oʻrnatilgan. Korxona yiliga 80 turdagi qandolatchilik mahsulotlarini 320 mlrdga ishlab chiqarishni rejalashtirmoqda, ularning 15-20% Xitoy va MDH mamlakatlariga eksport qilinadi.

Vera Modern Electrical kompaniyasi $21 mln loyihani amalga oshirib, 600 turdagi kabel-oʻtkazgich mahsulotlarini ishlab chiqarmoqda. Korxonaning eksport salohiyati $4 mln. Bundan tashqari, mahsulotning 35-40% ichki bozorga moʻljallangan, lokalizatsiya darajasi 70% ga yetadi.

"Soʻnggi yillarda tadbirkorlar uchun yaratilgan sharoitlar oʻz samarasini bermoqda. Bizning ishbilarmonlarimiz xilma-xil va sifatli mahsulotlar ishlab chiqarmoqda. Bu imkoniyatlarni har yili kengaytirib boramiz. Zero, tadbirkor — iqtisodiyot poydevori, davlat tayanchidirˮ — deb taʼkidladi Shavkat Mirziyoyev.

Texnoparkda Mimar Group ikki qavatli majmua qurgan boʻlib, u kichik korxonalar va hunarmandlarga boʻlib-boʻlib berilmoqda. Bugun bunday binolarda umumiy investitsiya hajmi $3 mln boʻlgan 4 ta kompaniya ish boshladi.

Kelajakda qurilish materiallari ishlab chiqarish, elektrotexnika, logistika va xizmatlar, toʻqimachilik va oziq-ovqat sanoati yoʻnalishlarida $386 mlnga 46 ta loyiha amalga oshirish rejalashtirilgan.

2025 yilga kelib texnoparkda $235 mlnga 37 ta loyiha, 2026 yilga kelib esa $50 mlnga 1 ta loyiha ishga tushiriladi. Natijada 10 ming ish oʻrni yaratiladi va $35 mln eksport salohiyati taʼminlanadi.